ទិដ្ឋភាពនៃការស្ថាបនាសសរស្ពានអ្នកលឿង ពីក្រោមផ្ទៃទឹក

ខាងក្រោមនេះ ជារូបថតមួយចំនួន ដែលមិត្តភក្តិធ្វើការនៅខាងស៊ីម៉ាក់ដោះមីន បានផ្ញើមកអោយខ្ញុំ តាំងពីក្នុងអំឡុងពាក់កណ្តាលឆ្នាំ២០១២, ជារូបថតទាក់ទងនឹងកិច្ចប្រតិបត្តិការបោសសំអាតគ្រាប់យុទ្ធភ័ណ្ឌមិនទាន់ផ្ទុះនៅបាតទន្លេ, ត្រង់កន្លែងសសរធំទាំងពីរ នៃសំណង់ស្ពានអ្នកលឿង…។ ដោយកាលពីម្សិលមិញ ខ្ញុំបានអានព័ត៌មាននៅគេហទំព័រក្នុងស្រុកមួយ ដែលនិយាយទាក់ទងដល់ការស្ថាបនាស្ពានអ្នកលឿង, ហើយក្នុងព័ត៌មានអះអាងថា បានរកឃើញគ្រាប់យុទ្ធភ័ណ្ឌមិនទាន់ផ្ទុះ រហូតដល់ទៅជិត ៥ពាន់គ្រាប់ ទាំងក្នុងទឹក និងទាំងនៅលើគោក ទើបធ្វើអោយខ្ញុំនឹកឃើញដល់រូបថតទាំងឡាយ ដែលខ្ញុំបានរក្សាទុក ហើយសម្រេចចិត្តចុះផ្សាយតែម្តងទៅ និងដើម្បីរក្សាទុកជាឯកសារនៅទីនេះផង…។ មានចំណុចមួយដែលខ្ញុំចាប់អារម្មណ៍, តាមរយៈរូបភាពបង្ហាញថា កុំថាឡើយខ្មែរដែលមានជំនឿអុជធូបបន់ស្រន់, សូម្បីតែវិស្វករជប៉ុន ក៏ត្រូវតែមកអុជធូបបន់ស្រន់សុំសេចក្តីសុខសប្បាយ មុនពេលដាក់ម៉ាស៊ីនខួងចុះទៅក្នុងផ្ទៃបាតទន្លេដែរ។ ចំពោះឈ្មោះស្ពានអ្នកលឿងវិញ ខ្ញុំទើបតែដឹងនៅព្រឹកថ្ងៃសម្ពោធនេះទេ គឺស្ពាននេះមានឈ្មោះជាផ្លូវការថា ស៊ឺបាសា (ជាអក្សរជប៉ុន ツバサ និងសរសេរជាឡាតាំងគឺ Tsubasa)… មិនដឹងថា តើឈ្មោះនេះមានន័យយ៉ាងម៉េចដែរទេ?.. បើអស់លោកណាដឹង សូមជួយប្រាប់ផង… :-D មើលតាមគំនូសប្លង់, សសរស្ពានធំទាំងពីរដែលយោងខ្សែកាប្លិនៅកណ្តាលទន្លេ ត្រូវបានស្ថាបនាឡើងចំលើទីតាំងដែលសម្បូរទៅដោយគ្រាប់យុទ្ធភ័ណ្ឌមិនទាន់ផ្ទុះ ។ ដោយហេតុនេះ ការប្រឈមនឹងកាកសំណល់នៃសង្រ្គាមទាំងអស់នោះ បានបង្កជាបញ្ហាព្រួយបារម្ភដល់ក្រុមវិស្វករជប៉ុន ដែលអាចនឹងមិនសម្រេចទៅតាមផែនការដែលបានគ្រោងទុក។ តែកិច្ចការទាំងអស់នោះ ត្រូវបានខាងស៊ីម៉ាក់ ដោះស្រាយបានដោយរលូន ប្រកបដោយប្រសិទ្ធភាព និងមានសុវត្ថិភាពបំផុត។ ជាការពិត, ទីតាំងស្ពានអ្នកលឿង សម្បូរទៅដោយគ្រាប់យុទ្ធភ័ណ្ឌមិនទាន់ផ្ទុះ ច្រើនប្រភេទណាស់។ តាមប្រវតិ្តនៃសង្រ្គាមស៊ីវិលក្នុងប្រទេសយើង, តំបន់អ្នកលឿងនេះ គឺជាសមរភូមិក្តៅគគុក ដោយរាប់ចាប់ពីព្រឹត្តិការណ៍យន្តហោះ បេ៥២ របស់ទព័អាកាសសហរដ្ឋអាមេរិក បានទម្លាក់ខុសគោលដៅ មកចំលើទីប្រជុំជនអ្នកលឿងឆេះខ្ទេចម៉ត់ (ដូចមាននៅក្នុងរឿងវាលពិឃាត ឬ The Killing Fields), ការពួនស្ទាក់វាយប្រហារដោយកងទ័ពរំដោះ ដើម្បីបាញ់ពន្លិចនាវាដឹកស្បៀង និងគ្រាប់រំសេវ របស់របបលោក លន់នល់, ការវាយប្រយុទ្ធស៊ីសាច់ហុតឈាមគ្នា រវាងកងទ័ពរំដោះ និងទាហានលន់ នល់ ដើម្បីដណ្តើមកាន់កាប់តំបន់អ្នកលឿងត្រើយខាងលិច នាដើមខែមេសា ឆ្នាំ១៩៧៥, និងចុងក្រោយ គឺការទប់មុខព្រួញកងទ័ពវៀតណាម ដើម្បីកុំអោយរុលឡើងច្រាំងអ្នកលឿងត្រើយខាងលិច ដោយកងទ័ពខ្មែរក្រហម នាថ្ងៃទី ៦ ខែមករា ឆ្នាំ១៩៧៩…។ កាលណោះ ខ្ញុំនៅចាំបានថា ក្នុងយប់ថ្ងៃទី ៦មករា ១៩៧៩, កងចល័តខ្ញុំ កំពុងស្ថិតនៅវាលបឹងមួយជិតឃុំប្រាសាទ ដែលនៅមិនឆ្ងាយប៉ុន្មានពីខាងលិចស្រុកលើកដែក។ ក្នុងយប់នោះ ខ្ញុំឮសម្លេងគ្រាប់ផ្ទុះ(អាចជាការឆេះផ្ទុះឃ្លាំងគ្រាប់) នៅតំបន់អ្នកលឿងនេះមួយយប់ទល់ភ្លឺ ហើយការផ្ទុះ បានធ្វើអោយផ្ទៃមេឃប៉ែកខាងកើត ប្រែពណ៌ទៅជាក្រហមសឹងមួយចំហៀងមេឃ…៕ប្រភព

top quoted

ទិដ្ឋភាពនៃការស្ថាបនាសសរស្ពានអ្នកលឿង ពីក្រោមផ្ទៃទឹក

0 Response to "ទិដ្ឋភាពនៃការស្ថាបនាសសរស្ពានអ្នកលឿង ពីក្រោមផ្ទៃទឹក"

Post a Comment

Interest relate

Entri Populer

ទិដ្ឋភាពនៃការស្ថាបនា​សសរស្ពានអ្នកលឿង ពីក្រោម​ផ្ទៃទឹក

0 Response to "ទិដ្ឋភាពនៃការស្ថាបនា​សសរស្ពានអ្នកលឿង ពីក្រោម​ផ្ទៃទឹក"